今日本身係到編緊坐位表 好鬼煩！點知收到一個電話後我決定要打埋呢篇文先可以結婚！

姊妹裙到今日仲未可以拎晒！有冇搞錯！

如果大家唔想係婚期前都要成日扑黎扑去陪姊妹試衫既話(想減肥者除外!), 就千其唔好去Elisa Bridal做衫, 唔係一定會激死係山林道20號錦興大廈1202室！唔係佢一二再, 再而三咁反口我都會打呢篇文！

詳情係咁...留心紅字！

5月24日 - 三個姊妹上去度身, 揀款, 揀料。當時, 我表示其餘兩位姊妹起碼要六月尾先可以黎度身！吳太話會先同呢三位姊妹做左先,分兩批做..呢三位姊妹七月尾有得Fitting!

6月7日 - 同伴娘度身做兩條裙(一早一晚)。當時, 吳太話七月尾可以同之前三位姊妹一齊Fitting!

6月21日 - 同其餘兩位姊妹去度身揀款。吳太話要八月尾or九月頭先有得Fitting!

7月21日 - 心思思打去問吳太幾時有得拎..吳太覆:做好會打比你！

8月18日 - 心諗又話七月尾會有得一批，點解仲未有?於是又打去問下，答案係：今個星期尾(8/23)未必有，不過，下星期一二應該有！(分批做既承諾無左啦！)

8月26日 - 仲未收到電話，於是又打去問，答案竟然係：呢個星期尾一定未有，不過，下星期一或二一定有,同埋如果試得o岩身可以即時拎走！(有冇搞錯，過左一星期個答案都係呢個，玩我呀！因為裙未到手，好！忍你．．．)

9月4日 - 約晒咁多人上去Fitting,原來D玫瑰花呀、伴娘條裙既閃石呀、泡泡裙都未整架囉！淨係得一位姊妹既閃石腰帶係整好囉！泡泡裙未整都算啦...我地一早知道要改o岩長度先整！但係個D玫瑰花又未整,伴娘條裙既閃石又未釘！都唔知係好彩定唔好彩,D姊妹既裙又有D鬆又D緊又D長得滯(度身做都咁！)!(心諗,肉隨帖版上,條裙仲係你手, 好...再忍忍...忍你！) 吳太又話下星期二(9/9)一定可以拎！(o岩身可以即刻拎,係咩?)

9月9日 - 兩位蔡小姐無驚無險咁拎走左佢地條裙,到伴娘上去既時候(未夠7pm),吳太竟然話佢條裙既石未釘(@#$%^@#$%...)(又話星期二無問題?原來要黎睇住你釘,咁你今朝又叫我叫D姊妹要今日六點前黎拎D裙走！)...7:XXPM我都到達間鋪, 間鋪當時有十幾廿個人,其間佢不斷咁serve客,又幫伴娘釘下石,我地等到7:50PM就釘完,試上身...點知.....條裙仲係咁長,無改過咁！(原來又未改既！明晒！)吳太係呢個時候就叫我地不如去食飯先...之後,先上黎, 一粒鐘會改好！橫掂真係勁餓, 同埋我係係間鋪到企足成粒鐘,隻腳攰到乜咁,所以,ja ja 臨去食飯先！8:50PM好準時咁上到去！嘩！條裙郁都無郁過囉！佢仲要幫緊其他人(頭先我地離開個時未見過架！即係o岩o岩上黎啦！)釘呢釘路,又改"夾"位！佢話要等多五個字！我無聽錯下話,終於忍唔住...

me:有乜理由幫o岩o岩黎個D可以即時改, 我要係到等..仲要係前前後後等左兩粒鐘啦喎！

Ng:唔係..你等左一個鐘姐！

ME:我地未夠七點到左！等完你釘珠又等你改裙囉,等你改裙長咪得左一粒鐘囉！前前後後咪兩粒鐘囉！我唔係想吹你, 但我今個星期六結婚,今日星期二,你有冇搞錯...(下刪三千字)

佢跟住返到去改...係改埋人地個條先囉！我就繼續狂Belebala咁鬧！真係成個八婆咁！

臨走前我要求同D姊妹拎埋D披肩走,竟然未有囉(嘩！我唔出聲你唔講架啦！)！佢話要特登叫上邊間廠做,做完寄落黎,聽日先有！大佬,做乜唔係同D裙一齊做,順便寄落黎囉下....擺明唔記得左,要後補囉！ 

跟住成9:30PM先可以離開間鋪頭囉！

9月10日13:13PM 收到吳太既電話,披肩係今日先有,不過可能好夜,唔想我d姊妹等得太夜,於是,最好聽日先黎拎！(哦！又明晒啦！原來"聽日有"唔代表around放工時間有,要好夜先有！明晒！)

總結:

1. 吳太係一個醒目女,明知你咁近婚期,一定無時間同佢嘈！你想撻訂都無時間再搵其他公司造！

2. 人手嚴重不足！雖然話拎落黎先加工,但係佢得一條友,跟本唔夠時間！我九月結婚都唔算旺季架啦！都咁...十月十一月就真係.....

P.S. Cherry,Kitty..Sorry呀！介紹左你地黎呢間造裙！你地要跟緊D呀！

今日一早就出左尖沙咀Noel Chu度Final Fit...12點去到...果然一個人都無....正！可以好輕鬆咁試衫....又無人"搶鏡"用.....出奇地件件又好o岩身喎(上網明明見好多人都話佢地改衫唔係好得...要改幾次架)！跟住就開始揀頭飾,頭紗,手襪....件件衫都有兩個頭飾可以揀...o係身邊無人比意見既情況下...又加上婚前嚴重既選擇恐懼症....揀黎揀去都做唔到決定...最後,K.Cat好好人...兩樣都比晒我！呵呵...頭紗,手襪我都要左兩Set...keke..！

之後,就約左個係TST返工既姊妹一齊食飯...食飽飽後就去整Highlight...估唔到淨係Highlight無染底色都要三粒幾鐘！之後,bf放工又去Noel Chu度Final Fit...選擇恐懼症又再次出現....呵呵....男禮佩件要左三set...bf可以有三個look la! Yeah! K.Cat果然好好人呢！

又收到一物結婚禮物啦！係擺設黎架！睇黎結完婚之後真係要買個飾物櫃先得啦！

所有襟花終於都有定案啦！

姊妹手花就用絲花..一來襟d..二來又輕d..方便做野... 

 主人襟花(綠色蕙蘭+紅色絲帶)

左:兄弟襟花(粉紅玫瑰+白色絲帶)         右:新郎夜晚襟花(轉紅色玫瑰+轉紅色絲帶)

一朝早又出左去派帖啦！陪個friend食埋個lunch之後, 我就番去元朗西鐵站間easy-wedding到拎茶具啦！

嘩...原來都好重下...拎到我死死下....

女家既...

男家既...

本身諗住係金都買賣咕o臣...但$88一對, 我地要買兩對(廢事搬黎搬去..)...咪要成$176!!!好似好唔抵咁！

所以, 我同BF就去左花園街試下搵Annie話既$40咕o臣...我地係近花墟個邊入...無幾耐就見到一當, 個"囍"字做得無咁靚...仲要$50!仲不斷話佢間鋪係全花園街最平架啦(心諗唔通平野真係無好)！跟住我地再行行行...行到尾咁滯就發現Annie話個間鋪啦！果然係$40!質地仲好過之前個間(個款係同金都個款一樣tim!有我地鐘意既羅馬綑繩！)！keke..咁我地就買左兩對番屋企啦！只係八十個大洋ja(金都一對都買唔到...keke)!

買完即時去左隔壁街最近又舒服既地方食野---風月堂！食完飯..休息完又轉戰女人街！原來要搵一條o岩心水既兄弟呔真係唔容易！同埋女人街買野原來好似大陸囉...我地係咁e睇到條隻色ok不過唔係斜紋...個老闆娘就開價$38!我地話要5條..佢話$150(嘩..可以平成$40咁多?)...我地話睇下先....佢就話$120!(唔係呀化?又減$30?)...跟住我地堅持閃(因為都唔係真係咁靚之嘛)....佢竟然話$100比我地(嘩...一開始咪當我地係水魚..short short地)！

再行左好耐, 發現間間賣既款真係差唔多....又因天氣實在太熱....隻腳又勁攰...所以, 最後買左呢幾條...款係我想要既..不過幼身左少少.....

汲取左之前既經驗, 我地知道d呔應該around$20條, 所以最後講價$90/5條成交..

今日好開心可以開始派帖啦！第一站, 去左沙田飲茶, 跟住, 再去隔壁大摩派。

派完就去TST join埋bf去酒店傾埋d菜單呀等等細節....然後, 係TST行黎行去搵兄弟呔...well..不過, 無收穫.....再去百利走一轉.....都係無收穫(...熱到爆！！！)...

跟住去金都買左以下咁多野.....係咪好靚呢......?

靚既背後其實..................................

今日巳時過大禮, 事前準備真係辛苦到爆, 你地睇下有幾多野！我同bf前一日得兩條友去拎！天氣又勁熱！

其中一部份....奇華五十斤餅、生果藍兩大個、女家回禮用品....etc

拜神個d....大發包等等又成枱都係...

hehe..其間執野個時, 我係到無聊影相...ee...包包偷望神台前面d大發包..."正呀！"

Close up一下d野先...

男家過大禮用品(其中一籃) - 椰子呀..茶葉..等等...成兩呎x兩呎咁大呀！

到時上頭用品...

特大生果籃(其中一籃)..

大發包(回淨一半)...

過大禮真係唔簡單呢.....

今日又約左一班結婚朋友仔出黎食飯啦, 又去CPK(肥死)！

大家都交換下大家的"痴膠花"黎研究研究...好開心呀！

呵呵...今日終於有少少時間幫佢地影相啦！

今次兩份禮物都come from Australia架！坐飛機過黎, 好架勢！

左邊係個幾月前bf表弟同表弟婦(爬表哥頭結婚..)送既...速遞到黎個時有少少漏水, 水晶球無左少少水...

右邊係我既姊妹一號去交流時買既...好有心思架...個熊仔d毛係人手一條條咁痴上去架！熊新娘仲有花球tim!好得意呀！多謝多謝！

同佢地影完相之後, 即時九秒九入番佢地入袋！因為屋企家陣無一個飾物櫃可以show佢地出黎, 家陣放佢地出黎, 真係係會變"食神(塵)"！